【卡路里】减肥净系睇热量？营养师教你5大健康饮食秘技！

想减肥自然要好小心咁选择食物，但好多人都会以「热量」作为唯一指标，觉得计好条「卡路里加减数」就减到肥，但现实又系咪咁？今次请嚟注册营养师MasterJack 教大家一啲健康嘅饮食方法！

1.减肥唔可以斋睇热量

MasterJack︰想减肥嘅话，唔好净系睇热量，大家仲需要睇埋食物嘅营养成份及结构。

事实上，脂肪提供既热量系最高，每1克有成9kcal，而蛋白质同碳水化合物每1克只提供4kcal，所以如果你去到超市望住个营养标签，揾脂肪相对少既食物，自然会拣到低热量既选择。除咗卡路里之外，你仲要睇埋吸收率。

脂肪嘅吸收率系好高，几乎食几多吸几多(1)。相反，粗糙碳水化合物（即系未被加工或被少量加工过）嘅吸收率就低好多啦。所以，大家唔应该盲目追求低卡路里食物，而系应该留意营养结构，揾低脂高纤既食物。

MasterJack︰「少食多餐」嘅饮食习惯可以提升新陈代谢，从而维持减肥既可持续性，而节食只能够短暂咁获得成果，而且仲会牺牲左你嘅新陈代谢，长远都系会反弹。

我喺上一篇文章都有讲过，节食虽然系可以减少每日食落肚嘅卡路里，但系当你吸收少左，人类身体其实系识得透过自行调节新陈代谢（呢个时候会减慢新陈代谢），嚟平衡卡路里嘅「收入」同「支出」。

当然，你嘅身体未必能够即时match到，喺未match到之前，你会暂时「收支失衡」（支出比收入多），并且达到减磅效果，但当个新陈代谢调节完，即系match到之后，你就唔能够再减到落去喇。

到左呢个时候，你可能要再食少啲，去再次形成「收支失衡」既状态，结果造成一个恶性循环，最终每日只能食好少好少嘅食物。

总括嚟讲，用节食既方式去减肥系好不智，相反，你系应该想办法去提升新陈代谢，从而帮助你减肥，而「少食多餐」就系其中一个方案。

MasterJack︰头先讲过要「少食多餐」，但冇理由返紧工做做吓嘢走去煮个面架。所以，如果常备一啲合适既「小食」，可以随时拎出嚟食，咁就唔使劳师动众，都做到「少食多餐」去维持新陈代谢喇。

当然我讲嘅「小食」唔系一包炸过嘅薯片啦，我所推荐既「小食」应该系一啲高纤、高粗糙碳水化合物、低脂、合理份量蛋白质嘅选择，例如系全麦面包或者某啲水果。

MasterJack︰碳水化合物系人类嘅首选燃料，任何时候都会拣渠嚟消耗先，基本上你每日食嘅碳水化合物，身体都会想尽办法日日清（当然要假设你唔系碳水化合物既狂热粉丝，一日食10碗饭啦）。

好多时候，你每日正常咁食嘅碳水化合物都会被用清光，所以点解碳水化合物应该要佔你每日热量来源嘅大部份，冇野留低自然唔会增肥，咁先易啲造成卡路里「收支失衡」（支出多于收入），最终达到减肥呢个目标。

MasterJack︰好多人都钟意去茶餐厅食晏，大部份碟头饭都起码700kcal，炒粉面饭仲成千个kcal，而且两者通常都系高脂肪、高蛋白质嘅食物，比较容易致肥。

相反，汤粉面好多时候都只系400-500kcal，唔计果啲高达800kcal嘅腩肉墨鱼丸麻辣米线、牛腩猪大肠油面等(2)。咁又唔系话叫你食个净汤粉面，好多配料其实都可以拣，例如首先拣个蔬菜，或者紫菜，跟住配腐竹、冬菇、白鱼蛋、云吞、萝白、木耳丝、金菇呢类低脂肪既配料，咁你碗面就「低脂低卡」喇。