繁忙慨香港人好多时连食早餐果少少时间都挤唔到出嚟，可能系因为每日要搭好耐车先返到公司，搞到食唔切早餐啦。不过，如果你系因为夜训又懒，要训到最后1分钟先起身，再用9秒9时间出门口上车，而食唔到早餐慨话，咁就唔啱啦。唔理咩原因都好，唔食早餐对身体一定唔好。因为唔食早餐理论上除咗会易啲肥，仲会难啲减肥。 资讯团队今次请嚟注册营养师MasterJack为大家推介5大健康早餐食谱，帮你食住早餐减肥！
如果本身已经有食开早餐慨朋友，恭喜你，请你Keep住呢个好习惯。你慨新陈代谢应该几好，而且你应该无咁易肥。不过如果你系无食开早餐，把口又成日讲住要减肥慨话，小弟想同你分享以下呢个有趣慨研究（个研究可能有啲深奥，小弟尽力深入浅出解释啦）。
减肥食两餐定3餐好？
喺好耐以前，有个研究，分左两班痴肥慨女性，一班本身1日食3餐（早、午、晚餐）；另一班就只系食两餐（午、晚餐）。研究员要渠地作出一啲改变嚟减肥，呢个改变就系要呢两班人每日食同等热量（1,200 kcal）同纤维份量慨食物，但系就要交换个饮食习惯。
呢个时候，你一定谂住我会讲：两餐变3餐慨人成功减到多啲肥。错啦，呢个研究其实系有利用控制组（Control Group），即系有喺呢两班人入面再细分多两班出嚟，即系总共有4班人，分别系：
A组：食开3餐，继续食3餐
B组：食开3餐，转做食两餐
C组：食开两餐，继续食两餐
D组：食开两餐，转做食3餐
研究结果发现4组人都减到肥。 （梗系啦，人人都净系食1,200 kcal，收支失衡嘛）。不过，B组同D组就比其他两组减到更加多磅数。研究结论系：生活习惯改变越大，就越能够改变更多慨体重（1）。
所以，无食早餐慨你如果想减肥，就唔该快啲食返早餐。有食开早餐慨你，都要继续食，只不过要减肥慨话，你就要喺早餐选择方面作出改变。
延伸阅读
- 【BMI 计算机】一文认识计算方法、男女正常标准！
早餐食咩好？
好啦，家阵我说服到你食早餐啦。咁食咩好呢？碳水化合物！
小弟讲过好几次，碳水化合物提供最少热量，但就系身体首选慨燃料，所以不作他选！仲有，高碳水化合物饮食可以降低饥饿素（Ghrelin）慨分泌，令到你无咁易肚饿，食嘢时识得收手，同埋唔会乱食零食(2)。
好多人以为早餐要食得好丰盛，仲食埋好多蛋白质。其实咁样系唔能够帮助身体提升新陈代谢去减肥。其实一个既简单又快捷慨高碳水化合物早餐就啱晒啦，完全唔需要搞咁多Fancy嘢。就等小弟推介5款食谱同食物选择俾大家啦:
-
买个高纤全麦包
有咩方便得过可以一路行一路食早餐？不过要小心喎！市面上好多面包铺卖慨麦包其实只系普通白面包混合俗称「黑水」慨色素，个包根本就唔系全麦慨。我相信只有买有营养标签慨面包先至分得到系咪真麦包啦。
-
焗完蕃薯再雪冻
蕃薯又易食、又健康、又方便。只要系前一晚买定返屋企（买啲好似正常香蕉大细咁，或者粗少少慨），洗干净，用支叉系每条蕃薯上面拮啲窿，放入焗炉焗30至45分钟，拎出嚟就食得啦。
如果朝早赶唔切，都可以前一晚焗定，再将啲蕃薯雪喺雪柜，因为蕃薯本身升糖指数（GI）已经低，雪过夜后会更低(3)。第二朝返工前，放入微波炉叮分零两分钟，香喷喷食得！
-
选择全糠谷物
以前慨粟米片的确唔系几健康，近年好多公司都将呢样食物加以改良，令渠高纤得嚟又唔难食。例如依家市面有啲全糠做慨粟米片（成份系无粟米），沟埋啲提子干，食落甜甜地又唔太过份，又吸引到你食多少少纤维，几啱赶时间慨你。
有研究显示，多食早餐谷物系可以降低皮质醇系早上慨水平，令你个人轻松啲同容易啲减肥㗎(4)。
-
燕麦伴香蕉粒或蓝莓
无食开燕麦觉得好难开始？可以试下加少少水果落去，加返少少甜味作为一个开始。燕麦其实唔一定买啲要煮慨，买即食或者快熟果啲都OK㗎啦。
-
菠菜炒鸡心豆印度烤饼卷
有时间慨话不如试吓系屋企做呢个比较另类，充满纤维同碳水化合物慨早餐！如果唔识自己浸鸡心豆，可以用罐头慨，拎出嚟冲洗干净，加埋洗干净同切埋慨菠菜，用少少橄榄油，蒜蓉同柠檬汁，炒好啲豆同菠菜，就可以放落印度烤饼度，卷埋渠就食得。
